Yehi Hai Khabar! Raat Ka Sannata
Ruki Hui Hawa
Tarrr Tarrr Karte Mendhak
Kharr Kharr Sota Chaprasi!
Pagdandiyon se hota hua
Aaaya koi Doot
Uska naam tha Bhoot
Hamne Poocha Yahan Kaise
Usne Kaha Raasta Bhoole..
...Is andhiyari main kisko Dhoondhain
Bhatak Rahain Hain Hum
chatak rahain Hain Gam
Tum Bolo to Yaheen Jaate Hain Tham
Kaam Kya Karoge
Sabki Neend Todoge
Kisika Sandesa ..Kisiko Doge
Apni Fursat...Hamari Baichaini
Hamse na chalegi ye Be-imani
Thak Gaye Ho To So Jao
Bhor Hote Hi Nikal Jao
Pata zara Dikhana
Kahan Tumhe Hai Jana
Patwari se poochenge
Koi to Upai Soojhenge
achha Yeh Batao
Tumko chalne ki kya soojhi
Tum to Bhoot Ho ji
Ud Kar Pahunch Jaate
Jhat Khabar De aate...
Hamari Kaum Gayee Hai Saham
Ab Kaam Ho Raha Tang
Insaan itna uth gaya ki
Hamare pairon se bhi Nikal gaya
Aankhe Phade Rah Jaate Hain Dang
Salon purani batain ho gayeen hain Bhang
Roji Thi Hamari ...Brahma ki likhayi
Banta Hua Kaam Tha...Chhanta Hua Naam Tha
Ab Hamse Kaun Darega
Ab to Sirf Insaan Insaan Se Darega
Yehi Hai Khabar ...Yehi Hai Khabar
Jidhar Pahuncha Do ...waheen Hain Sahar...Waheen Hai Sahar....
| 
